寡嘴罚王老板冒表紧，还得到两百块钱奖金，同事都要寡嘴请客，寡嘴心里不愿意，也不说请也不说不请，就说奖金八字还谬一撇，等资金发得下来再说。
寡嘴也不是只小器人，舍不得一点嗯个钱，其是觉得里两百块钱意义不一样，其想跟荷香得买个么东西得，其肚里都想好得，就买一只绷得，穿得身上叭紧个嗯种，上头露个半边奶得，两只奶鼓鼓得，下头露个肚脐眼得，细细腰得，雪白个身子。寡嘴认为荷香得要是穿上好衣裳，就跟画图得上个电影明星样个好看。当然，荷香得穿里个好看个衣裳，只能在屋里穿，让寡嘴一个人看，不能让别人也看荷香得个奶，看荷香得个肚脐眼得。
寡嘴把里个话都跟荷香得说得，荷香得红得面说：“我不穿嗯个鬼衣裳，难看得死，跟只妖精样个。”
寡嘴看荷香得个样子晓得，荷香得肚里想穿嗯样个绷得，第二日得冒上班个时得，跑到街看得好几只服装店，想正得一件，问得一下价钱，老板娘说要一百多块钱，寡嘴一点都不觉得贵，就等奖金发下来就买。
寡嘴还跟荷香得说，同事晓得有奖金，要请客，问荷香得郎个办。荷香得说，一点点嗯个钱得，又要请客又要买衣裳，不够。寡嘴说嗯就不请。荷香得说不请也几难为情。寡嘴说嗯就请。
过得只多礼拜，奖金发得下来，同事说，寡嘴，今朝总要请客吧。两百块钱做两样用，寡嘴冒想好到底郎个请，不做声。一帮人就和。正好王老板来得，问么事。一帮人说要寡嘴请客。王老板架式说嗯帮人，两百块钱请客哪里够。心里又一转说是要请，还问寡嘴在哪里请客，说其也去。寡嘴吞得好多时，最后有得一只好主意，说是街心花园。王老板问么时得，寡嘴说下得班就去。
下得班，寡嘴急急忙忙跑得房里，泡得一包方便面吃，恰吃完，一帮人就来得。寡嘴就说走。
走到万里大道，寡嘴带一帮人等车。有人趱劲叫的士，寡嘴说，不坐的士，里个多人坐不下。还是坐公交同去。话冒说几多时得，公交来得，一帮人都上得公交，寡嘴早就准备好得十几只角子，一个人一只，全部都是其介得账。
到得街心花园，一帮人问寡嘴到哪只馆子里去。寡嘴说先不急，请大家看戏。说王老板还冒来。街心花园有好多人唱黄梅戏，看戏表钱，有个时得也有人拿只东西来，愿拿个就拿几块钱。
看得好多时戏，一帮人表得寡嘴吃得方便面，一个一个肚里饿得咕叫个，说不看不看。寡嘴四到里相相，看到得王老板。其实王老板几辰来得。寡嘴有上回罚老板个事做底，晓得今朝自己个做法冒错。就说，嗯帮人等下得吓。就一个人跑得路边上炒粉个摊得上，叫得十几盘粉过来。
寡嘴呀寡嘴，你请客，就是请我帮人吃里个炒粉那！一帮人都不肯。可是，又实在是饿死得，有人不管许多，先吃得再说。有人开得头，既帮人就三下两下把盘粉式得下肚。说冒吃饱也差不多。王老板一盘粉实在吃不下去，先减得大半盘到别人。
吃完得粉，一般人还要寡嘴请客。
寡嘴说，我请大家坐得车，看得戏，吃得粉，还不肯呀。
王老板：“寡嘴好小器，要不我请，要到哪里去吃过。”
里帮人听说王老板请客，当然欢喜。王老板问里帮人想跟么得。寡嘴就说：“今朝老板请客，里个宴个，馆子店里都要关门，要不就上夜宵摊得吃。”里帮人也不管许多，就一路跑到夜宵摊得上吃得个二五搭一十。王老板算得一下账，二百啦块钱得。寡嘴卖乘嘴得说其介账，王老板肯定不让。
王老板要寡嘴请客，就是想看看其只脑子灵凡。寡嘴里样个请客，王老板好满意，打简介过下得舞个细细官得到寡嘴做。
赣公网安备 36042802000101号