寡嘴工厂里管人事个前两日得贴得一只通知，说员工要按时上下班，不能迟到、也不能早退。寡嘴在通知前头看得半上昼，硬是一只字一只字地把通知上个内容读懂得。寡嘴想啊，我是一只保安，里只上、下班迟到跟早退个银都要走门卫室过啊！我自己不要迟到得，下番跟荷香到街心花园去看银家跳舞要早些得回来，夜根要早些得酣，里一定要帮人事部把里只事管好！冒有规矩，画不成方跟圆。
下得班后，寡嘴骑自行车得，带荷香到街心公园去恰炒罗丝，还喝得冰啤酒。一边恰，一边跟荷香说得下昼公司人事部那只通告个事，荷香听后，蛮赞成寡嘴个想法。还说，你一定要在厂里好好得做，攒劲赚钱，俺两个银过年结婚个钱都要靠厂里个工资，你莫响里响气丢得饭碗得，到时候要唤南风！得到得荷香个支持，寡嘴浑身都是劲，想到明昼早根一定要做只样子出来，要让荷香觉得跟我寡嘴是值得咯！
第二日得早根，寡嘴抖擞精神，在门口站得笔直个，两只眼钟象鹰一样个，对每只同事都瞪太一双牛一样个眼种，有些胆小个女崽里吓得赶紧一路小跑望自己个车间里去得。里个时得，荷香也从外头走得进来，看到寡嘴个样子，马上笑弯得腰。对寡嘴说：“你工作认真不是要你跟看贼头一样个，进出个都是同事，你里个样子要吓倒银家！”寡嘴马上来了个立正，对荷香敬得一只礼说：“荷香同志，我正在上班时间，嗯侬不要嘻嘻哈哈，妨碍我侬个工作是要处罚咯！”荷香看其一脸正经个，吓得一吐舌头，跑到自己车间里上班去得。寡嘴一看8点都过得好几分，也冒捉到一只迟到个员工，真是扯卵蛋，白忙活得一场。
寡嘴看员工都来得差不多得，马上把厂里个电动伸缩门关上得，坐到保安室里写值班记录，将今天早晨个情况写得个太概。然后站倒岗亭里，站得根一颗树一样！远远得看，还真个象只当兵个！
寡嘴银虽然站在岗亭里个，脑子却跟天马一样个，东想西想，特别是跟荷香得确定得恋爱关系后，寡嘴跟换得一只银一样，说话也不再寡三寡四，一门心思得对荷香好，以前看到排场女崽里眼种都不转珠个毛病也改得，换成得盯到荷香得面上发呆，有时根看得荷香都不好意思。但想到今朝早根对荷香那个凶个，表得夜跟荷香要郎个对付我侬？
寡嘴正在胡思乱想，一阵嘀嘀嘀小轿车个喇叭把寡嘴拉回得现实中，寡嘴赶紧扭着往外头一看，哦！是王总个车，寡嘴本来想马上按伸缩门个遥控！但其一看表，九点十分了，好象王总今朝迟到得，昨日下昼看人事个通知，说总经理每日早晨九点也必须下班，其迟到到十分钟，要不要也拦下来罚款呢？寡嘴感觉到有点不好办！昨日在荷香面前信誓旦旦，不管是么银，只要是迟到得，我一定会公事公办！现在是老板迟到得，我要不要放行呢？如果我放得其，其会不会反过来说我工作不认真，炒掉我侬啊？荷香说年底结婚个钱还在王老板手里啊？要是失得工作，里只婚也结不正啊！……电光火石间，寡嘴打得一十八只监介！王总又在按喇叭，还把车窗放得下来，很客气地说，麻烦你把门开一下，我车要开进去！就在里只当口，寡嘴打好得监介，就算是老板炒得我个鱿鱼，就算冒有钱结婚，在荷香面许下得个诺言不许反悔，今朝我就要尽一只保安个责任。然后，寡嘴快步来到王总个车前，标标准准地给王总敬得一只礼：“王总你侬好，不好意思，你今朝迟到得十分钟，按照人事部个规定，要罚款一百块钱！”
王总听到寡嘴一番话，睛种瞪得象铃铛一样太，马上反问，寡嘴，你晓不晓得我是里只厂个老板啊？我迟到得也要罚钱？你侬有冒有搞错啊？
寡嘴说：“王总你侬好，我记得你侬经常告我帮银，在制度面前，银银平等，里堆着个银银是不是也包括王总你侬啊！？”
王总：“话是仰个说个，不过我是老板，罚我个钱不等于从我左边口袋里放到右边口袋里去啊？再说，你要是惹毛得我，我今朝就叫你侬卷铺盖到屋里去！”
寡嘴听到里个话，当时火又上来得，头一扬，脸上马上充血红通通个，“王总，就算等下得我要到屋里去作田，你今朝迟到得，100块钱还是要罚！我寡嘴只认理不认银，你是老板也一样个要罚！
王总跳神个笑得起来，握着寡嘴个手说：“寡嘴啊，我以前真个以为你只是喜欢吹牛、说谎、扯大炮，冒想到你侬对工作里个负责个，感谢你侬，今朝一百块钱我认罚！而且我还要奖你侬二百块钱！我要个就是你侬里样个负责个员工！好好干！今年年终个优秀员工提名，我肯定会提你侬！”
王总走到保安室，在一张罚款单上写上了自己个名字以及罚款一百块个原因，并且在另外一张奖励单上写上奖励寡嘴二百块个奖励申请单，然后说，你侬放心，我罚个一百块钱，让财务部交到工厂个工会里去，用在员工身上，绝对不会从我左手口袋放到顺手口袋里去！
寡嘴终于将悬起的心放到肚子里去得，站在岗亭里，想哪晚上郎个跟荷香讲自己罚老板钱个事情！
赣公网安备 36042802000101号