棋子老馆忙得跟只牵郎猪样咯，整霓看不到银影。眼看孙得军军结婚个霓子就到得。脚都走瘫得，手机也打破得，一半钱都冇舞到。思来想去，决定趁里哈得过年大家都在屋里，开一遮家庭会。
到得里霓得。好早就恰得夜饭，等四遮崽全部坐好，棋子老馆就开始话事：……哩咯多个银在外地擒钱，啷个就擒不到一遮结婚个钱来。一遮银、拿来不到一万，有么得用！是么事故跷？
大崽：嗲得，嗯又不是不晓得，我下钢哩咯多个年头，又冇有下钢费，啊要交养老金，我跟耶遮姆妈两个银在市里打零工得又不稳定，摆遮夜摊得就是舞得细得恰饭个钱，女婆得跟崽弟读遮大学，花钱跟流水样个。我尽了最大咯努力。
二崽；我擒得几多钱得，嗲得全部晓得，我只老婆又冇有用，炉饭抄菜都结结赖赖，啊要我跟嗲得做对手。咯咤女崽娌又犟，一分钱都不能少。我真无能。讨遮新妇得就里个难咯，唉！
三崽： 冇想到军军哩咯快个就话到得老婆！要哩咯多个钱！我遮店一下又转不出器， 要是能打欠条个话，我就有办法。
四崽：我只卡上啊有两万左右个存款，本来是留到发不出工资时交房贷，先拿来用吧……
三新妇得不晓得从哪遮旯旮里钻得出来：本来我不该话事咯。好不容易都在里得，我就话话我屋里遮鬼东西。爷不是冇有擒到钱。跟霓得打麻酱，又困野老婆得！店里个钱我一分钱都冇看到过，再里样个下器，离婚！
棋子老馆遮屎股跟么得烫得样个。屋里冇有听到一遮银话事，冇过几多时今得，棋子老馆端起端得恰得两口茶，站及起来话：里遮事以后再话，今朝到里得为止。
里一夜，好象被褥里长得虱，棋子老馆是极坐不安，到四更鸡叫两遍才迷迷糊糊困得。被别银叫醒已是天光得好多时今。棋子老馆想爬起来时感到浑身不对头，软不拉肌个，脑壳也是晕晕沉沉咯，手脚冇一点劲。很快，棋子老馆被送到医院，医师里听听改看看， 又是量血压，又是血常规，又是哎革斯光片，忙得大半遮下昼，最后对老馆几遮崽话：“冇大病，老银家身体虚虐，操心过度，打几瓶掉针，在屋里好好休养就冇有事”。里遮西边老医师话个事啊、真好听。
棋子老馆回到屋里后把几遮崽叫到闷口话：我里遮家好大。跟国家不一样，国家有法律。屋里银都要把心架在中间才能和和睦睦，情理二字要记在仔心肝得上。我好，就千一万好。军军年纪大，脑壳又木，舞只老婆不容易。要是我有事，嗯一旁银一定要想办法拿崽俚遮事办好，以后就各银过各银个。……出来咯时今得老二老四遮眼珠都是红个。
两霓后个早晨，老馆屋里就传出哭声。棋子老馆死了。
出殡个霓得，老馆个二新妇得从棋子老馆遮房里出来，不小心被东西舞倒得，爬起咯时今得哝咕了一句：“一遮俚个死老馆，魔死银”。
赣公网安备 36042802000101号